خلطة السبع بهارات العربية

كتير منستخدم بمطابخنا الشامية خلطة منسميها ببساطة “بهارات” وبتدخل بكتير من الوصفات السورية، اسمها التجاري “الخلطة العربية” أو “البهارات العربية” ومستخدمة اليوم بأغلب المطاعم حول العالم.

وفي جدال كبير على منشأها هل هو لبناني أو سوري أو فلسطيني، لكن بكل حال اسمها الاحترافي العالمي هو “خلطة سبع بهارات عربية” ونزلت ع السوق كما يقال خلال القرن 17 مع توافد جالية هندية باكستانية كبيرة للمنطقة، وبالأخص لدمشق.

لتحضر كمية بتكفي شهر بالمطبخ رح تلزمنا هالمقادير من المكونات، ولازم تكون جميعاً حب. والأفضل ما نستعمل المكونات المطحونة إلا للاستخدام السريع بيوم أو يومين بالكتير.

1. 3 ملاعق ط فلفل أسود 
2. ملعقتين ط كمّون
3. ملعقة ط بذور الكزبرة 
4. ملعقة ط زعفران أو حبتين كبش قرنفل
5. نصف ملعقة ط هيل
6. حبتين جوزة الطيب
7. نصف عود قرفة (حوالي 5 سم)

أما للتحضير، فلازم نرفع حرارة الفرن سلفاً حتى 180 درجة، منفرد المكونات على صينية الفرن بين 5 حتى 10 دقايق حتى تروح منها الرطوبة تماماً، وفي حال عدم توفّر الفرن ممكن نحمّص الحبوب بالمقلاية مع التحريك المستمر لمدة ١٠ دقايق على نار وسط.

بعد التجفيف منطحن جميع المكونات سوا بجرن الهاون أو باستخدام مطحنة الحبوب الكهربائية (مطحنة البن)، ومنترك المسحوق بصحن ليبرد.

أخيراً منعبي الخلطة بقطرميز زجاجي ومنحط معها صرة شاش صغيرة فيها رز، لسحب الرطوبة باستمرار.

يفضّل استخدام الخلطة خلال ست أشهر، قبل نموّ الفطور المكرسكوبية. لكن هيك كميّة صغيرة رح تُستهلك غالباً بوقت أقصر بكتير.
حالياً، بعض المصانع عم تستخدم منكّهات ومواد كيماوية لتخفيف استخدام المواد الطبيعية، وبالتالي توفير الكلفة وزيادة الربح، بالإضافة لاستخدام المواد الحافظة حتى تعيش الخلطة وقت طويل. لهالسبب من الأفضل طحن الخلطة بالبيت.

شاركني رأيك

The short URL of the present article is: https://wp.me/pacTxK-4b