أنواع الباذنجان الشائعة عالمياً

محبّة بالبتنجان حبيت اكتب هالتدوينة عن أنواع البتنجان وتاريخه، هدية لمحبّي البتنجان وعشاق طعمه الشهي وتطبيقاته الكتيرة والمتنوعة.

شيلا فيورنزو فنانة طبخ أميركية-إيطالية، وكاتبة مهمّة بعالم التغذية، معها درجة ماستر من جامعة إيطالية متخصّصة بعلوم تذوّق الطعام. شيلا مصرّة دايماً على تسمية البتنجان “الباذنجان المجيد” وبتذكره بكتاباتها بعبارة Glorious Eggplant وما بتقبل ينذكر البتنجان بدون تمجيد مناسب.

بالإضافة لانه شيلا فيورنزو بتحب تصنّف البتنجان من الفواكي مش من الخضار، وبتقول: البتنجان بكل أنواعه من فواكه الصيف، لا يمكن اعتباره خضار، رغم اعتيادنا على أكله مطهي. وبتنصح ما نشتري البتنجان من المحلات إذا عنا قدرة نشتري من المزراع مباشرة، والسبب إنه المحلات ما بتعرف ولا بيوصلها إلا الحبّات المختارة من هالثمرة، المتماثلة بالحجم واللون، وهالاختيار بحسب فيورنزو عم يحصر وصفاتنا بعدد قليل من الخيارات، يلي ممكن تتنوع أكتر حسب أنواع ومقاسات حبات البتنجان، لما نشتريها من فلاح جمعها من الأرض على تنوعها واختلافاتها.

وهلأ منحكي بعشر أنواع شائعة من البتنجان حسب مستوى انتشارها مرتبة بحسب فيورنزو…

الباذنجان المنقوش (البتنجان الگرافيتي)

البتنجان المنقوش هو أكتر نوع بتنجان شائع بسوريا، مشهور عالمياً باسم البتنجان الصقلّي Sicilian eggplant. وأخد تسميته بالمنقوش بسبب الخطوط البيضا والوردية على قشرته. هالخطوط بتختفي إذا انطبخ هالبتنجان مع قشرته. واستخدامات هالنوع واسعة جداً وممكن يستعمل بأي وصفة بتلاقي فيها كلمة بتنجان.

الباذنجان الإيطالي

البتنجان الإيطالي هو المعروف بسوريا باسم البتنجان الحمصي، وهو النوع المفضّل عند أغلب السوريين للمكدوس، ورغم إنه شكله مشابه بالعموم للنوع الأسود الشائع من البتنجان يلي ممكن تلاقيه بأي محل، لكنه متميز بالطعم ونوع مستقل. حجمه أصغر من النوع الشائه وشكله سمين ومنفوخ، ومع ذلك لما نشتريه طازه منشعر ممسك الحبة وازنه وتقيله وما بترن لما ننقر عليها متل البتنجان الشائع. ممكن يستخدم بكتير من الوصفات والتطبيقات، لكنه من الأنواع المحبّذة بالأطباق المشوية وخصوصاً الإيطالية، بالإضافة للمكدوس.

الباذنجان الياباني والصيني

هالنوع من البتنجان مميز بطوله، رفيع وطويل متل الخيار والكوسا لكن اللون والريحة والطعم بتنجان. وهالنوع بتنصنف لنوعين الحقيقة، الياباني وردي أكتر من الصيني، بينما البتنجان الصيني أخف بالوزن وأطول. لكن النوعين بتميزوا سوا بقشرة رقيقة، وشبه خالي من البذور، وعند الطهي بصير جسم البتنجاناية كريمي أكتر من الأنواع الشائعة. ممكن استخدام هالنوع بمختلف التطبيقات لكن بسبب قوامه فاستخدامه أفضل للمازات والشوي ع النار والقلي مغلّف.

باذنجان الحكايات الخيالية 

سبب تسمية هالبتنجان هو وجوده مرسوم بمختلف كتب حكايات الأطفال الخرافية وأفلام الكارتون، نوع صغير جداً من البتنجان متل الأصابع السمينة. قشرة هالنوع لونها وردي مخطط بالأبيض وطول حبتها ما بيتجاوز طول راحة الكف. ممكن استخدام هالنوع بنفس استخدامات الأنواع الكبيرة، لكن تطبيقات الشوي بتفضلهم أكتر بسبب الحجم، خصوصاً الشوي ع السيخ.

الباذنجان الأبيض

هالنوع من البتنجان ومن اسمه بيتميز بقشرة بيضاء تماماً، لكنه من الداخل ما بيختلف عن أي بتنجان معروف، لا بالطعم ولا بالقوام، لكن بسبب لونه فهو محبّب مشوي جنب السمك.

الباذنجان الهندي

هالنوع مشهور بسوريا باسم البتنجان الصغير أو البتنجان الحموي، ومعروف عالمياً باسم baby eggplant، حجمه صغير بشكل ملحوظ ومحدّب مكوّر أكتر من غيره ولونه وردي داكن بيعطي على لون الفجل. وظريف كتير هالنوع للشوي بالفرن وللمحاشي، وفي ناس بتفضله للمكدوس بسبب حجمه. عموماً طعمه أخف من البتنجان الشائع ومناسب جداً للسوصات المختلفة، وهو أنسب نوع لصناعة مربى البتنجان

الباذنجان الأخضر

هالنوع قشرته مميزة بلون أخضر فاتح باهت، مليان مي ومدعبل ومنحس مسكته أتقل من غيره. نكهته خفيفة وأكتر نوع كريمي بعد الطبخ. ممكن يستخدم بمعظم الوصفات لكن ممكن يتحوّل لكريما بكل سهولة متل المتبل، داخل الطبخة.

الباذنجان التايلاندي

بتنجان تايلاند هو أصغر بتنجان على الإطلاق، مدعبل ولون قشرته أخضر متماوج مع الأبيض متل البطيخة. وهاد النوع صعب يلتقى بالسوق لكن إذا صادفته بالسوق فهو أنسب نوع لسوصات الكاري والطبخات الحامضة.

بالختام معلومة ع الماشي من تجربتي الشخصية ومن نصائح الطباخين على يوتيوب، لا تحتفظ بالبتنجان بالبراد (التلاجة بالمصري)، والسبب هو نوع من الفطور البيضا يلي بتنمو بسرعة على قشرة البتنجان بسبب رطوبة البراد وحرارته الواطية، وما منشوفها بالعين إلا إذا كانت كميتها كتير كبيرة. أفضل مكان لحفظ البتنجان هو سلة من القش أو الخشب بحرارة المطبخ، مكشوف بدون غطا، وما بصير يلامس البطيخ أو الموز أو الحمضيات أو البطاطا أو البصل، أو أي ثمار بتحتوي قشرتها على الكحول. وفي حال كانت حرارة المطبخ أعلى من ٣٠ درجة فالأفضل نحفظ البتنجان داخل خزانة المطبخ وكمان بدون ما يتغطى حتى ما تتجمع رطوبة التنفس على قشرة البتنجان.

بتمنى تكون هالمعلومات مفيدة