‫وحدة من أهمّ الصناعات السورية “مؤامرة عالمية”‬

‫سنة 2008 مَلو هلسا ورنا سلام بيشتغلوا سوا على كتاب بالإنگليزية بعنوان “الحياة السريّة للملابس الداخلية النسائية السورية: الحميمية والتصميم” Secret Life of Syrian Lingerie: Intimacy and Design، وتم نشر الكتاب بسانفرانسيسكو بأميركا عن طريق الناشر كرونيكل بوكس Chronicle Books.‬

‫ملو هلسا كاتبة أميركية، ورنا سلام مصمّمة گرافك لبنانية، وتنيناتهم عايشين بلندن بإنگلترا.‬

‫سنة 2008 بأيلول بتبدأ حملة كبيرة لتسويق الكتاب من خلال أهمّ الكتّاب والصحفيّين الأميركيّين، فبتكتب عنّه الصحف الأميركية بالإضافة لأكرون بيكون رئيسة تحرير جورنال مهمّ بأوهَايو.‬

‫سنة 2008 بكانون الأوّل، كمان الصحف البريطانية بتسوّق للكتاب وبتنشر مقابلات مع ملو ورنا حول مواضيع الكتاب وظروف كتابته، ومنهم صحيفة الإندپندنت المتابعة من قبل الشباب.‬

‫سنة 2008 كمان BBC بتنشر تقرير خاص فيها عن الأسرار الجنسية للأسواق السورية بعنوان Sexy secrets of the Syrian souk، اشتغل التقرير وقتها مارتن أسّر، وكمان ذكر كتاب ملو ورنا.‬

‫طبعاً من بعد BBC كلّ صحف أوروپا والمتوسّط والعالم كتبت عن الكتاب ونشرت مقابلات مع الكاتبتين، وكمان عملت تقارير منفصلة عن سوق الحميدية الدمشقي وصناعة الملابس الداخلية النسائية فيها.‬

‫وقتها الحكومة السورية اعتبرت الكتاب والحملة العالميّة هجوم تآمري على سوريا، وعيبة بحقّ الهوية السورية والشرف السوري قدّام الأجانب.‬

‫سنة 2009 رجل أعمال أميركي من ميامي فلوريدا، بيشتغل بأعمال العقارات، اسمه جفري يونس Jeff Yunis بيقرأ الكتاب وبيعمل زيارة لدمشق.‬

‫بعد الزيارة بيرجع جف لأميركا وبأسّس بلاس ڤيٓگَس “المعرض الدولي لتجارة الملابس الداخلية النسائية” international lingerie trade show يلّي بحقّق نجاح كبير وبصير من أهمّ الأحداث التجارية السنوية بلاس ڤيٓگَس، وعلى طريق العالمية.‬

‫سنة 2014 المعرض بوقف بسبب مرض ووفاة جف يونس بعمر ٦٦، وبيرجع المعرض بكمّل بنسخة جديدة سنة 2017، بأيلول.‬

‫أنا بتوقع لهالمعرض يصير من أهمّ الأحداث العالميّة، لأنّه حدث مرتبط بالصناعة صراحة ومرتبط بوحدة من أهمّ الصناعات بعالمنا. وكنت بتمنّى لو فكرة هالمعرض الدولي بديت من سوق الحميدية، من دمشق نفسها، استغلالاً لنشر الكتاب سابق الذكر والضجّة المثارة حول موضوعه، بدل ما تبدأ من لاس ڤيٓگس.‬

‫هالصناعة عريقة وقديمة بمنطقة الشرق الأوسط وبالأخص بدمشق، وكان من الممكن تحويلها لقطب عالمي وتخصّص تجاري سوري، بدل اعتبار الاهتمام فيها مؤامرة عالميّة على سوريا و”وهن لعزيمة الأمّة”.‬

شاركني رأيك

The short URL of the present article is: https://wp.me/pacTxK-74