أنواع الأرز الشائعة بالسوق

الأرز البسمتي: هو الأرز الپاكستاني المقشور بدون سلق، لكن متروكة عليه القشرة الداخلية، طبخه متوسط الصعوبة، وهو الأرز المفضل بمطاعم البلدان من الهند شرقاً وحتى البحر الأحمر. ٩٥٪ من إنتاج البسمتي بالعالم بيجي من منطقة الپُنجاب الهندية.

الأرز المزّه: هو الأرز البسمتي المسلوق قبل التقشير. سهل الطبخ لأنه ما بعجّن ولا بلبصن بسهولة، غذائياً هالرز تقيل شوي، لأن حبّة الأرز امتصّت المواد المفيدة من القشرة عند السلق. هالأرز هو من أغلى الأنواع بالسوق وقليل بالأسواق.

الأرز الأبيض: هو الأرز البسمتي يلّي انشالت كل قشوره بحيث بيصفى لب حبّة الأرز من دون سلق. وهو الأكتر شعبية بالشرق الأوسط وبأوروپة، وطبخه صعب لأنه بيحتاج انتباه عند الطبخ حتى ما يلبصن ولا يعجّن. ومن ميزاته هالأرز عدم احتواءه على أي مواد مفيدة، مجرد سكر ونشا، بينحرق بسرعة وبتحتاج منه وجبة كبيرة لتحس بالشبع.

الأرز البنّي: هو الأرز البسمتي يلي انشالت عنه القشرة الخارجية فقط وانتركت القشور الداخلية لأنها مليانه بالڤَيتامين B وكتير من المواد المفيدة. وقت طبخ هاد النوع من الأرز لازم ما تنفتح الطنجرة طوال فترة الطبخ. هالرز أقسى من غيره لهالسبب بيحتاج كمية مي أكبر أثناء السلق ووقت أكتر، ومن ميزاته الإحساس بالشبع بأقل كمية منه بسبب احتواء القشرة على الألياف المفيدة.

الأرز الياباني: هو أرز الحبة القصيرة الآسيوي المستخدم لتحضير السوشي، بعض الثقافات بتسميه الأرز الشمعي، هالأرز طعمه حلو وطبخه بيتطلب أقل كمية مي بين أنواع الأرز، وبلبصن شو ما عملنا، وصالح للعجن في حال حابين نعمل معجنات من الأرز.

الأرز البري: هو الأرز الأميركي الطويل، قشرته رقيقة جداً لهالسبب متروكة عليه، وهو أنسب أرز للحشوات لأن حجمه ما بيتضاعف كتير بعد السلق، ومن ميزاته إنه خالي من الگلوتين، ونسبه البروتين فيه عالية، لهالسبب مناسب للناس يلي بتتحسس من الگلوتين وبتعاني مع هضم الأرز والمعجنات.

الأرز الصيني: هو نوع من أرز بسمتي لكن قصير، مصدره الأم بنگلادش لكن انتشرت زراعته التجارية بعموم جنوب آسيا، طبخه أسهل وأسرع من أرز بسمتي رغم إنه مقشور، لكن من عيوبه انه بينشف بسرعة وما خرج يبات بعد الطبخ. وهو أكتر أنوع الأرز المنتشر بالأسواق الأوروپية حالياً.

الأرز المصري: الأرز المصري بالسوق نوعين، كتير ناس ما بتميز بيناتهن، الأول هو المصري والتاني هو الكامولينو، النوع الأول مهدّد بالانقراض بسبب القرارات الحكومية، حبّته متوسطة لا طويلة ولا قصيره ومن أهم ميزاته بياض لونه الناصع بعد الطبخ وسهولة هضمه، وحبته متماسكة بعد السلق لهالسبب الناس بتحب منظره ع السفرة. أما النوع الثاني فانتشرت زراعته من مصر بأستراليا وإيطاليا والعراق وسوريا، وعرفناه بالسوق السورية باسم الأرز الأسترالي (صنوايت).

الأرز الهاشمي: أرز مزروع بإيران وغير منتشر عالمياً، لكنه مناسب جداً لطبخات المرق بسبب حفاظ الحبة على قوامها حتى لو انتقعت بالمرق بعد السلق.

أرز عنبر أو رز العنبر أو تمن العنبر أو الشلب هو أحد أنواع الرز، يُعد الأفضل والأكثر إنتاجاً في العراق بسبب شدة بياضه ورائحته المميزة ونسبة البروتين العالية و كبر حجم البذرة. يزرع في النجف والديوانية وبابل والناصرية والمشخاب.

خبروني بالتعليقات إذا بتعرفوا ماركات بالسوبرماركت من هالأنواع من الأرز، خاصة إنها بتتغير بكل بلد، وإذا بتعرفو أنواع تانية يا ريت تحكولنا عنها… شو هو الأرز المفضل عندك؟