أغلبنا شباب صاير ما عندها وقت للطبخ بسبب الشغل وساعاته الطويلة، منوصل ع البيت هلكانين من الشغل وبدنا لقمة تجهز ع السريع.
لكن هالظروف ما بتمنع نحصل على وجبة لذيذة ومرتّبة ننبسط فيها ع السريع بعد يوم شغل ممل. لهالسبب في سلصات جاهزة بالسوپرماركت ممكن تحل مشكلة الوقت.
أطيب سوص طلع من منطقة البلقان هو سوص آيفار يللي ممكن نلاقيه جاهز بأي سوپرماركت بأوروپا، وبيغني عن البندورة كرمال ناكل سلصة حمرا، وبذلك بتنحل مشكلة بعض الطبخات يلي ما بتناسبها طعمة البندورة.
سوص آيفار اخترعوه الصرب بالقرن 19 أساساً كبديل عن الكاڤيار، يعني كاڤيار نباتي. وكلمة آيفار هي بالواقع تحوير صربي لكلمة خيڤار العثمانية يلي معناها كاڤيار.
أول أيام هالسوص بالسوق صارت الناس تناديله كاڤيار صربي (خيڤار زربلي) لكن مع الوقت صار اسمه آيفار وتميّزت تسميته وَحْدَهُ.
إذا حابب تعمل آيفار بالبيت الموضوع سهل نسبياً… منشوي فليفلة حلوة كبيرة (يفضل شوي ع النار) وبعدين منفرمها ناعم بلا بزر مع فليفلة شطة (النسبة 3 حلوة ل1 شطة) مع توم.
منطبخ هالفرمة بزيت زيتون لحتى تصير تعجبنا طعمتها، وخلصت.
أنا بشوي بتنجاناية مع الفليفلات وبخلطهم سوا وتطلع الطعمة خيالية وبتعمل كتير أكلات طيبة.
هلأ كيف نستخدم الآيڤار لطبخة سريعة؟
مثلاً، علبة حمّص على علبة فاصوليا بيضا مع آيفار ودبس رمان بتطلع أكلة بتشهّي.
أو مثلاً، علبة فاصوليا حمرا على كاسة رز مع آيفار وطعمة بتدعولي عليها.
حتى خبزة منغمّسها بالآيفار، بتطلع بنفس طيابة المحمّره.
اترك رد